Mogadishu- 21-June-2007- Somchess.com Guddoomiyaha xiriirka Somaliyeed ee Shataranjiga Axmed Cabdi Xasan Wataac iyo ciyaartooy ka tirsan xiriirkaasi ayaa maanta ka duulay magaalada Muqdisho, iyagoo u baqoolay magaalada Khartoum ee dalka Sudan oo ay kaga qeyb qaadanayaan tartan ay halkaasi ku leeyihiin xiriirada dalalka Carabta ee ciyaaraha shataranjiga.

Ciyaartooydaan Somaliyeed oo ka kooban 6 kana socda xiriirka Shataraniga Somaliyeed ayaa maanta waxaa xaflad sagootin ah loogu sameeyay Baar Fiat ee magaalada Muqdisho ka hor inta aysan ka ambabixin magaalada Muqdisho.

Xafladii sagootinta oo socotey muddo labo saacadood ah ayaa waxaa ka soo qeybgalay saraakiil sar sare oo ka socotey xiriirka Somaliyeed ee ciyaaraha ee marka la soo gaabiyo loo yaqaano GOS, xubno ka socday dowladda KMG ah iyo marti sharaf kale oo lagu casuumay.

Guddoomiyaha xiriirka Somaliyeed ee Shataranjiga Axmed Cabdi Xasan Wataac ayaa qudbad uu ka jeediyay halkaasi waxa uu sheegay in ay ku rajo weyn yihiin in ay guulo ka keenaan tartanka haatan ay u socdaan isla markaan aanu aheyn markii ugu horreysay oo xiriirkooda ciyaartooy ka socota ay kulamo ceenkaan oo kale ah dibaddaha u aadaan.

Waxa uu ku booriyay ciyaartooyda xiriirka Somaliyeed ee Shataranjiga in ay muujiyeen niyadsami isla markaana ay si wanaagsan ula tartamaan kooxaha ka soo horjeeda.

Sidoo kale Waxaa halkaasi hadalo ka jeediyay Aadan yabaroow Wiish oo ka socoday xiriirka Somaliyeed ee ciyaaraha, isagoo ku amaanay ciyaartooyda xiriirka Shataranjiga sida ay ugu diyaargaroobeen ciyaaraha, isagoo ku booriyay in ay la yimaadaan maskax dagan iyo dulqaad dheeri ah si ay u guulesytaan.

Ma ahan markii ugu horreysay oo xiriirka Somaliyeed ee Shataranjiga ciyaartooy iyo macalimiin ka socota ay tartamo u aadaan dalalka dibadda, iyagoo horey dhowr tartan uga soo qeyb qaatay.

Somali Chess Federation, Somalia
Feedback:- info@somchess.com